Urdu ke maya naaz jasusi navel nigar, tanz w mazah nigar, mashhur shayer 'Ibn e Safi' ki Birth and Death date 26 July.

Ibn Safi 26 July 1928 ko Qasba Nara District Allahabad me paida huye. Asl name Asrar Ahmed Ibn Safiullah tha. unhon ne apni adbi zindagi ki  shuruat shayari se ki aur Asrar Narv takhallus ikhtiyar kiya. 1948 me unhon ne Tagral Fargan ke name se tanziya aur mazahiya mazmun likhe jo bahot maqbul huye. 1952 me unhon ne jasusi duniya ke name se jasusi navels ka ek silsila likhna shuru kiya, is silsile ka pahela navel 'diler mujrim' tha jo 1952 me Adara Nikhat Allahabad se chhapa, August 1952 me Ibn Safi Hijrat karke Pakistan chale gaye aur yahan se 'Imran series' ke name  se ek aur silsila shuru kiya jiska pahela navel 'Khaufnak Imarat' October 1955 me Karachi se aur December 1955 me Allahabad se chhapa, Ibn Safi ne is silsile ke total 120 navel likhe, is silsile ka akhri navel 'Akhri Admi' tha jo Ibn Safi ki death ke bad 11 October 1980 ko chhapa. October 1958 me Ibn Safi ne Imran series ke sath sath jasusi duniya ka silsila dobara shuru kiya, is  silsile ka Pakistan se chhapne wala pahela navel 'Thandi Aag' tha, 1960 se 1963 ke dauran Ibn Safi 'Episode of Severe Depression' ki bimari ka shikar rahe, jiski wajah se 3 sal tak koi  navel nahi chhapa, Lekin is dauran Ibn Safi ke name se milte julte qalmi name se jasusi navel ke ek sailab market me agaya, 1963 me Ibn Safi ki sehatyabi ke bad ek navel 'Dedh matwale' chhapa to Ibn Safi ke diwanon ne ise hathon hath liya aur nasir ko ek hafte ke andar iska dusra adition chhapna pada jo urdu fiction ki tarikh me ek record hai, Ibn Safi ke navel 'Bebakon ki Talash' par ek film 'Dhamaka' ban chuki hai, magar ye film kamyab na ho saki, Baqol Ibn Safi ke log mere navel khud to chhup chhup kar padhte hain lekin Ibn Safi ke navelon ko adab ke havale se zaher ka darja dete hain, Ibn Safi apne bare me kahte hain ke tanz mazah mera fun nahi balke kamzori hai aur kamzori isliye ke main sahab iqtedar nahi hun sahab iqtedar hota to mere hath me qalm ki jagah danda hota aur main tanz karne ki jagah haddiyan todta, meri ye kamzori qaum ki adat ban gai aur log bala se wah wah na kare logon ko hay hay to nahi karni padegi, Zamana talib ilmi me shayari ki shuruat ki thi Ibn Safi ki paheli nazm 'Bansuri ki Awaz' apne college ke ek mushayre me sunai jo bahot pasand ki gai,  Jasusi duniya ke alava tanz mazah ke maidan me bhiIbn Safi ka shumar Urdu ke mutabar adibon me hota hai,

Rahe talab me kon kisi ka, apne bhi begane hain

chand se mukhde rashke gazalan sab jane pahechane hain

tanhai hi tanhai hai kaise kahun kaise samjhaen

chasm w lab w rukhsar ki tah me ruhon ke virane hain

 uf ye talashe husn w haqiqat kis ja thaheren jayen kahan

sehan chaman me ful khile hain sehra me divane hain

hamko sahare kya ras ayen apna sahara hain ham aap

khud hi sahera khud hi divane shama nafs parvane hain

apne vajud ki masti hai ham rindon ke ahval na puch

qadam qadam pe chhed khirad se nafs nafs maikhane hain

bil akhir thak har ke yaro ham ne bhi ye taslim kiya

apni zat se ishq hai sachha baqi sab afsane hain

---------------------------

26 July 1980 ko khud ki 52 salgrah par is duniya se rukhsat ho gaye.